डोटी, असोज २३
डोटीको दिपायल सिलगढी नगरपालिका–५ बसपार्कमा बिजुलीको तार सर्ट भएर आगलागी भएको छ। बिहीबार साँझ करिब ६:५० बजेकाे समयमा स्थानीय महेश तिखात्रीको ढुंगामाटोले बनेको, स्लेटले छाएको तीन तले घरमा आगलागी हुँदा घरमा आंशिक क्षति पुगेको जिल्ला प्रहरी कार्यालय डोटीले जनाएको छ।
आगलागीबाट घरभित्र रहेका खाद्यान्न, लत्ताकपडा, फर्निचर, भाँडाबर्तन, कागजात, ल्यापटप २ थान, एलइडी टिभी १ थान र बाकसमा राखिएको नगद १० हजार रुपैयाँ जलेर नष्ट भएको प्रहरीले जानकारी दिएको छ।
प्रहरी निरीक्षक दानसिंह कार्कीको कमाण्डमा ११ जना प्रहरी टोली, नेपाली सेना र स्थानीयको सहयोगमा आगो करिब साँझ ७:३० बजे पूर्ण रूपमा नियन्त्रणमा लिइएको थियो ।
आगलागीबाट मानविय तथा चौपाया क्षति भने नभएको प्रहरीले जनाएको छ। बिगो रकमको विवरण संकलन भइरहेको प्रहरीले जनाएको छ।
